د خیبر چارواکي وايي په تیرا کې په یو ځانمرګي برید کې لږ تر لږه یو سرتېری وژل شوی او شپږ نور ژوبل شوي دي.
په تیرا کې د امنیتي ځواکونو یو چارواکي د نوم پټ ساتلو په شرط مشال راډیو ته وویل چې د اګست پر ۲۹مه د زخه خېلو د پړک بنګلې پر پوځي هیډکوارټر په ځانمرګي برید ګې د مرګ ژوبلې ترڅنګ ودانۍ ته هم تاوان رسېدلی دی. د نوموړي په وینا په ځانمرګی برید کې یو حوالدار وژل شوی او شپږ سرتېري ژوبل شوي دي.
چارواکي وايي ژوبل سرتېري د درملنې لپاره روغتون ته رسول شوي او په شاوخوا سیمو کې د نورو وسلوالو د لټون عملیات پیل شوي دي.
د برید ذمه واري اتحاد المجاهدین پاکستان په نوم وسلوالې ډلې قبوله کړې ده. دا ډله د خیبر پښتونخوا په خیبر، ټانک، ډېره اسماعیل خان، شمالي وزیرستان او جنوبي وزیرستان کې فعالیت لري او تر دې وړاندې یې هم پر امنیتي ادارو د ځینو بریدونو مسوولیت قبول کړی دی. په دې ډله کې لشکر اسلام او نورې وسلوالې ډلې شاملې دي.
تر تیرا وړاندې د اګست پر ۲۵مه په هنګو کې پر اېف سي کلا وسلوال برید کې درې سرتېري وژل شوي او ۱۷ ژوبل شوي وو.
د هغه حملې ذمه واري چا نه وه قبوله کړې.
په تېرو اونیو کې په خیبر پښتونخوا کې وسلوالو پر پولیسو او امنیتي سرتېرو یوشمېر حملې کړې دي. د اګست پر ۱۹مه وسلوالو د خیبر ضلعې په لواړګي (لنډي کوتل) کې د ملېشې ځواک یو سرتېری وواژه.
د اګست پر ۱۳مه وسلوالو شپې مهال د پېښور په حسن خېلو کې پر تاڼه ډزې وکړې چې پکې یو پولیس ووژل شو. تر دې څه باندې یوه اونۍ مخکې وسلوالو په پېښور کې د پولیسو یو افسر او د هغه دوه ملګري ووژل.
د هغو ټولو حملو ذمه واري هم چا نه وه منلې.
په تېرو شاوخوا څلورو کلونو کې په خیبر پښتونخوا کې ناامني خورا زیاته شوې او وسلوال وخت په وخت پر پولیسو، سرتېرو، حکومتي کارکوونکو، سیاستوالانو، دیني عالمانو، کاروباریانو، ولسي مشرانو، پخوانیو او مخالفو وسلوالو او فعالانو حملې کوي. له دې پرته، وسلوالې ډلې وخت په وخت د حملو تر څنګ تښتونې کوي او له شتمنو کسانو باج هم غواړي.
د پاکستان او د خیبر پښتونخوا حکومتونه وايي، د ناامنۍ ضد مبارزې او د ولس ژوند او مال ساتنې ته ژمن دي. وزیراعظم شهباز شریف د اګست پر ۱۴مه د هېواد جوړېدو کلیزې په مناسبت په وینا کې دعوه وکړه چې پاکستان "په زړورتیا د ترهګرۍ پرضد جنګېدلی او ورته یې ماتې ورکړې" ده او زیاته یې کړه چې حکومت به یې بیا وسلوال سر پورته کولو ته پرې نه ږدي.
په همدې حال کې امنیتي ځواکونو او پولیسو هم د وسلوالو پر وړاندې هدفي عملیاتو ته دوام ورکړی دی.
د خیبر پښتونخوا اعلاوزیر علي امین ګنډه پور د جولای په پای کې په یو ویډیويي بیان کې وویل، "ترهګرۍ د صوبې د پرمختګ مخه ډب" کړې او ټینګار یې وکړ چې ټول باید له امنیتي ځواکونو سره د سولې او امنیت په برخه کې هڅو ته دوام ورکړي.
تر دې څو اونۍ مخکې د خیبر پښتونخوا حکومتي ویاند محمد علي سیف هم په سوات کې خبري غونډې ته ویلي ول چې حکومت یې د وسلو کاروونکو پر ضد جنګېږي او که څوک جوړجاړی غواړي نو ورسره جرګو او مرکو ته هم تیار دی.