د فرانسې پخوانی ولسمشر نیکولا سرکوزي نن (د اکتوبر پر ۲۱مه) د پينځو کلونو لپاره په پاریس کې يو زندان ته لېږدول شوی دی.
دا تر هغه وروسته ده چې ۷۰ کلن سرکوزي د جنایي سازمان په جوړولو کې د ونډې اخیستو په تور مجرم وپېژندل شو.
پر هغه تور دی چې د ولسمشریزو انتخاباتو د کيمپېن د تمویل لپاره يې د ليبيا له پخواني آمر معمر قذافي څخه پيسې اخيستې وې.
نوموړی له ۲۰۰۷ز څخه تر ۲۰۱۲ز پورې د فرانسې ولسمشر وو.
سرکوزي پر خپلې بې ګناهۍ ټينګار کړی او په يو بیان کې، چې پر اېکس پاڼه يې خپور کړی، ليکلي دي: "زه بې ګناه يم، او د دې عدالتي رسوايۍ د افشا کولو هڅې ته به دوام ورکړم."
هغه زياته کړه چې دا پرېکړه د يوې "اوږدې او ناعادلانه" څېړنې پايله ده، چې پر "جعلي سند" ولاړه وه.
سرکوزي به د پاریس په مرکز کې په "لا سانته" زندان کې د بند موده تېروي.
راپورونه وايي، هغه به د ساتنې په ځانګړې څانګه کې وساتل شي، خو د چارواکو په وينا، له ده سره به هيڅ ډول ځانګړی امتیازي چلند نه کېږي.
