د بلوچستان د پولیسو مرستیال مشر حامد شکیل ووژل شو
د بلوچستان په مرکز کوټه کې یوې بمي چاودنې د صوبې د پولیسو مرستیال مشر حامد شکیل او دوه نور پولیس وژلي دي. د چارشنبې په سهار د کوټې پر ایرپورټ روډ د چمن هاوسنګ سکیم و مخې ته داسې چاودنه شوې ده چې غږ یې تر لرې اورېدل شوی دی. چاودنه په داسې وخت کې شوې ده چې د بلوچستان د پولیسو مرستیال مشر حامد شکیل په خپل موټر کې له کوره دفتر ته روان وو. په دې پېښه کې د حامد شکیل تر څنګ د هغه یو امنیت ساتونکی رمضان او موټر چلونکی خلیل احمد هم وژل شوي او څلور نور ساتونکي ټپي شوي دي.