چارواکي وايي وسلوالو په چمن کې د پولیو د واکسیني ډلې مشر په ډزو ویشتلی دی.
په چمن کې د لیویز ځواک چارواکو مشال راډیو ته وویل چې دا برید د اګست پر ۲۹مه د چمن په روغاني سیمه کې شوی او د پولیو ټیم مشر (سپروایزر) حافظ قادر پکې وژل شوی دی.
د سیمې پولیس وايي، پر موټر سایکل سپاره بریدګر له ډزو کولو وروسته تښتېدلي دي او پر ضد یې مقدمه درج کړل شوې ده.
دا برید پر داسې مهال ترسره شوی دی چې د بلوچستان روغتیا څانګې د سېپټېمبر له لومړۍ نېټې نه د صوبې په ۲۶ ضلعو کې د پولیو ضد کمپاین پیلولو اعلان کړی دی. یاده اداره وايي هوډ لري چې په دې کمپاین کې به له دوو مېلیونو څخه زیاتو ماشومانو ته د پولیو ضد څاڅکي ورکړي.
د بلوچستان په ګډون د پاکستان په بېلابېلو سیمو کې تر دې وړاندې هم د پولیو پر ټیمونو همدا ډول بریدونه ترسره شوي دي چې پکې واکسیناتورانو، د هغوی ساتونکیو پولیسو او نورو خلکو ته مرګ ژوبله اوښتې ده.
تر اوسه لا د بريد ذمه واري چا نه ده منلې.
پاکستان او افغانستان د نړۍ یوازیني هېوادونه دي چې پکې لا هم د پولیو وایرس موجود دی.
پاکستان کې د روغتيا ملي ادارې روان کال د اګست تر ۲۶مې د ګوزڼ ۲۳ پېښې ثبت کړې دي چې له جملې نه یې په خیبر پښتونخوا کې ۱۵، په سیند کې شپږ او په پنجاب او د اسلام اباد تر واک لاندې په ګلګت - بلتستان کې یوه، یوه پېښه ثبت شوې ده.
تر دې مخکې په ۲۰۲۴ز کال کې په پاکستان کې د پولیو ټولې ۷۴ پېښې ثبت شوې وې. تېر کال په پاکستان کې د ګوزڼ پېښې د ۲۰۲۳ز کال پرتله په بېساري ډول زیاتې شوې. په هغه هېواد کې په ۲۰۲۳ز کال کې د ګوزڼ شپږ پېښې ثبت شوې وې.
بلخوا په افغانستان کې تېر کال ۲۳ ماشومان ګوزڼ وهلي ول چې زياتره يې د هېلمند او کندهار ولایتونو اوسېدونکي ول.