جرمني د درېیم ځل لپاره یوه ډله افغانان په دې هېواد کې د استوګنې لپاره منلي دي.
د جرمني خبري اژانس راپور ورکوي چې دا افغانانو دا ډله د اکتوبر پر ۳۰مه په یوه تجارتي الوتکه کې له پاکستانه د ترکیې له لارې جرمني ته تللې ده.
جرمني په تېره مې میاشت کې د کډوالو د منلو پروګرام وځنډاوه خو دوه ځلې مخکې یې هم هغه افغانان منلي دي چې وايي، په افغانستان کې یې ژوند په خطر کې دی.
دا افغانان لومړی هانوور ښار ته او له هغه ځایه د جرمني نورو ښارونو ته استول شوي دي.
اوس مهال زرګونه افغانان په پاکستان او نورو هېوادونو کې مېشت دي او په پرمختللو هېوادونو کې د کډوال په توګه د منل کېدو په انتظار دي.
د جرمني د بهرنیو چارو وزارت وايي چې شاوخوا "۲،۶۰۰ افغانان" چې "په ځانګړي ډول له خطر سره مخامخ دي جرمني ته د تګ په انتظار په پاکستان کې مېشت دي."
په داسې حال کې چې د روانې میاشتې له پیل راهیسې له پاکستانه د افغانانو د ایستلو دویم پړاو روان دی او داسې اندېښنې دي چې اسلام اباد ښايي غربي هېوادونو ته د تګ منتظر افغانان هم وباسي، د جرمني د بهرنیو چارو وزارت وايي چې په دې اړه له پاکستانیو چارواکو سره "نېږدې همغږي" لري او د هغو افغانانو لېږد ته ژمن دي.
المان غږ ووبپاڼه وايي چې برلېن د روان کال په فبرورۍ او مارچ کې په درې چارټر پروازونو کې ۴۶۱ افغانان جرمني ته ولېږدول.
د جرمني په ګډون یوشمېر غربي هېوادونو د ۲۰۲۱ز کال په اګست کې پر افغانستان د طالبانو له واکمنېدو راهیسې له خطر سره مخامخ لسګونه زره افغانان خپلو ملکونو ته لېږدولي دي.
