پراګ ـ د بلوچستان په مرکز کوټه ښار کې د مې د ۱۳مې په ماسخوتن د یوې چاودنې په ترڅ کې لږ تر لږه درې پولیس سرتېري وژل شوي او شپږ کسان ژوبل شوي دي.
د بلوچستان د صوبايي حکومت ویاند لیاقت شهواني مشال راډیو ته وویل چې په ژوبلو کې درې پولیس سرتېري او درې ولسي کسان دي.
د ډان ورځپاڼې په ګډون ځیني پاکستاني رسنۍ د مرګ ژوبلې شمېره تر دې زیاته ښايي.
د لیاقت شهواني په وینا دوی ګومان کوي چې بم پر موټر سایکل ځای پر ځای کړل شوی وو او د پولیسو ګاډی یې په نښه کړی دی.
د پولیسو سرتېري په سټلایټ ټاون سیمه کې د الهدا جومات مخې ته موظف شوي وو چې د تراویح د لمانځه پر مهال د خلکو امنیت وساتي.
