پولیس چارواکي وايي په باجوړ کې پر یو کور د هاوان (مارټر) توغندي لګېدو پېښه کې یو تن وژل شوی او دوه نور ژوبل شوي دي.
د باجوړ د پولیسو یو چارواکي چې له رسنیو سره یې د خبرو اجازې نه درلودلو له وجې د نوم د پټ ساتلو غوښتنه کوله د اګست پر ۲۹مه یې مشال راډیو ته وویل چې دا پېښه د اګست پر ۲۸مه په نښتر کلي کې رامنځ ته شوې ده کوم چې د لوی ماموندو د تاڼې په حدودو کې راځي.
نوموړي دا ونه ویل چې هاوان چا توغولی وو خو دومره یې وویل چې دا د یو ځايي اوسېدونکي محمد یعقوب پر کور لګېدلی دی چې له وجې یې نوموړی وژل شوی او د کورنۍ دوه نور غړي یې پکې ژوبل شوي دي.
د پولیسو یاد چارواکی وايي ژوبل تنان چې د محمد یعقوب ښځه او وراره دي، د درملنې لپاره د باجوړ یو مقامي روغتون ته لېږدول شوي دي. هغه البته د ژوبلو تنانو د وضعیت په اړه نور څه ونه ویل.
دا پېښه پر داسې مهال شوې د لوی ماموندو په مختلفو برخو کې د مشکوکو وسلوالو پرضد د امنیتي ځواکونو عملیات او ګرځبندیز (کرفیو) دوام لري. د دغو عملیاتو له وجې له سیمې څخه تر ۱۰۰،۰۰۰ زیات کسان بې کوره شوي دي چې د مرکز خار په لوبغالي کې د جوړ کیمپ په ګډون د ضلعې او خیبر پښتونخوا نورو برخو ته تللي دي.
په دغو عملیاتو کې د راپورونو له مخې خلکو ته د مرګ ژوبله هم ور اوړېدلې ده.
په باجوړ کې په دې وروستیو کې ناامني زیاته شوې ده او د وسلوالو په بریدونو کې ولسي خلکو، مشرانو، سیاستوالانو او د پولیسو سرتېرو او پوځ ته مرګ ژوبله اوښتې ده.
تر دې وړاندې د اګست پر ۲۰مه د باجوړ په عنایت کلا کې چاودنه شوې وه چې د پولیسو په وینا لږ تر لږه دوه تنان پکې ژوبل شوي ول.
د هغه برید ذمه واري چا نه وه منلې.
په تېرو شاوخوا څلورو کلونو کې د باجوړ په ګډون په خیبر پښتونخوا او بلوچستان کې ناامني خورا زیاته شوې او وسلوال وخت په وخت پر پولیسو، سرتېرو، حکومتي کارکوونکو، سیاستوالانو، دیني عالمانو، کاروباریانو، ولسي مشرانو، پخوانیو او مخالفو وسلوالو او فعالانو حملې کوي. له دې پرته، وسلوالې ډلې وخت په وخت د حملو تر څنګ تښتونې کوي او له شتمنو کسانو باج هم غواړي.
د پاکستان او د خیبر پښتونخوا حکومتونه وايي، د ناامنۍ ضد مبارزې او د ولس ژوند او مال ساتنې ته ژمن دي.