د بلوچستان های کورټ د درغلیو د تورونو پلټنو لپاره جوړې جرګګۍ یا ټرېبیونل د قامي اسمبلۍ د بلوچستان صوبې د ۲۵۱مې حلقې د نتایجو په اړه پرېکړه د جون تر ۱۱مې نېټې پورې وځنډوله.
دا له هغې وروسته ده چې د جون پر درېیمه د یادې حلقې د ټاکنو په ۲۲ مرکزونو کې د استعمال شویو رایو دوباره شمېرنه وشوه. له دې حلقې د پښتونخوا نېشنل عوامي ګوند د خوشال خان کاکړ او د جمیعت علمای اسلام (ف) د مولوي سمیع الدین ترمینځ مقابله وه.
د ۲۰۲۴ز کال د فبرورۍ د اتمې نېټې په انتخاباتو کې د سرکاري پایلو له مخې مولوي سمیع الدین په اېن اې ۲۵۱ حلقه باندې ترسره شوي انتخابات ګټلي ول. خو هغه مهال خوشال خان کاکړ په هغو نتایجو اعتراض لرلو.
دا هم وګورئ: د بلوچستان حکومت ۱۴ کسيزې کابینې لوړه کړې دهوروسته د بلوچستان های کورټ د ۲۰۲۵ز کال د مې پر ۲۲مه امر وکړ چې د اېن اې ۲۵۱ حلقې په ۲۲ انتخاباتي مرکزونو کې دې دوباره رایې وشمېرل شي.
د جون په درېیمه په ټاکلو ۲۲ ټاکنیزو مرکزونو کې د رایو له دوباره شمېرلو وروسته د پښتونخوا نېشنل عوامي ګوند مشر خوشال خان کاکړ په ژوب کې خپلو پلویانو ته د وینا پر مهال وویل چې په یاده حلقه ده انتخابات ګټلي دي. "په فارم ۴۵ کې زموږ رایې ۴۴۹۰ وې خو دوی د تېر ځل رایو شمېرلو پر مهال دا ۲۷۰۰ حساب کړې وې، زموږ رایې یې غورځولې وې."
خو د درېیم جون د دوباره رایه شمېرنې په اړه جمیعت علمای اسلام (ف) ګوند نیوکې لري. د یاد ګوند د ژوب سیمې امیر مولوي محمد سرور مشال راډیو ته وویل چې دوباره شمېرنې د هغوی د کاندید په غیر موجودګۍ کې ترسره شوې دي نو ځکه یې نه مني: "موږ یې نه منو ځکه چې د رایو د دوباره شمېرلو پر مهال زموږ نماینده هورې نه وو موجود. دویم اعتراض مو دا دی چې دوی باطلې رایې شمېرلې دي او درېیمه دا چې د رایو صندوقونه د خوشال خان په قبضه کې ول."
دا هم وګورئ: د پاکستان د قامي اسمبلۍ نویو منتخبو غړو لوړه کړې دهبل پلو، پښتونخوا نېشنل عوامي ګوند که څه هم د جمیعت علمای اسلام (ف) د تازه نیوکو په اړه مشال راډیو ته څه نه دي ویلي خو د هغوی د ګوند یو مخکښ رضا محمد رضا وايي چې دا څوکۍ له اوله خوشال خان کاکړ ګټلې وه او د جون په درېیمه د رایو دوباره شمېرلو هم دا ثابته کړه چې نوموړی بریالی دی.
خو د جون تر څلورمې الیکشن کمېشن د خوشال خان کاکړ د بریا سرکاري اعلان نه دی کړی او په همدې ورځ د انتخاباتي مرکز د رایو ګڼلو مسوول (ریټرننګ افسر) د اېن اې ۲۵۱ حلقې د دوباره شمېرل شویو رایو راپور په بلوچستان های کورټ کې جمع کړ.
د بلوچستان های کورټ د درغلیو د تورونو پلټنو لپاره جوړه جرګګۍ یا ټرېبیونل د جون پر څلورمه د قضیې له اورېدو وروسته د غونډې اورېدنه د جون تر ۱۱مې وځنډوله. ټرېبیونل ریټرننګ افسر ته دا امر هم وکړ چې د جون پر درېیمه د رایو د دوباره شمېرنې د پایلو د راپور یوه کاپي دې د جمیعت علمای اسلام (ف) وکیل ته هم وسپارل شي.
خوشال خان کاکړ د پښتونخوا ملي عوامي ګوند د یو پخواني مشر او سېنېټر عثمان خان کاکړ زوی دی. نوموړی اوس د پښتونخوا نېشنل عوامي ګوند مشري په غاړه لري.