د پاکستان د کرکټ ملي لوبډلې د درې اړخیزه ۲۰ اووره کرکټ لوبلړۍ په پایلوبه کې سري لنکا ته په شپږو وېکټو ماتې ورکړه.
د نومبر پر ۲۹مه د راولپېنډۍ په لوبغالي کې د سیالۍ پچه کوربه پاکستان وګټله او لومړی یې توپ اچونه (بالېنګ) غوره کړه.
د سري لنکايي لوبډلې لومړی بیټر د ۲۰ په مجموعي منډو وسوځېد خو کامل مېشارا او کوشال مینډس د دویمې وېکټې ښه شراکت وکړ او ټولې منډې یې تر ۸۴ ورسولې. البته تر دې وروسته د سري لنکا توپ اچوونکي یو په بل پسې ژر، ژر وسوځېدل.
د سري لنکا ټوله لوبډله په ۲۰م اوور کې په ۱۱۴ منډو وسوځېده. مېشارا ۵۹ او مینډس ۱۴ منډې وکړې.
د پاکستان شاهین شاه اپرېدي او محمد نواز درې، درې او ابرار احمد دوه وېکټې واخیستې.
په ځواب کې پاکستان ټاکلی هدف په ۱۹م اوور کې د څلورو وېکټو په زیان پوره کړ. بابر اعظم ۳۷، صایم ایوب ۳۶ او صاحبزاده فرحان ۲۳ منډې وکړې.
د سري لنکا پون رتنایکې دوه وېکټې واخیستې.
د پاکستان محمد نواز هم د سیالۍ او هم د لوبلړۍ غوره لوبغاړی شو.
په درې اړخیزه لوبلړۍ کې له پاکستان او سري لنکا پرته د زېمبابوې ملي لوبډلې هم برخه واخیسته.
ټاکل شوې وه چې په هغو سیالیو کې د کوربه پاکستان او سري لنکا ترڅنګ د افغانستان کرکټ لوبډلې هم برخه اخیستې وای.
خو افغان کرکټ بورډ په اکتوبر کې په پکتیکا کې د پاکستانیو ځواکونو په برید کې د "کرکټ د درې ځوانو لوبغاړو" تر وژنې وروسته په هغو درې اړخیزه سیالیو کې د ګډون پلان لغوه کړی وو.
تر دې وروسته د پاکستان کرکټ بورډ اعلان وکړ چې د افغانستان پر ځای به زېمبابوې په سیالیو کې ګډون وکړي.
د ۲۰ اووره کرکټ درې اخیزه لوبلړۍ سیالۍ د نومبر پر ۱۸مه پیل شوې وې.